دايم نحط اللوم على الآخرين
وننسى اننا ..للآخرين ؟ الآخرين
الانسان دايم يرمي أخطاءه لغير
والغير يرمي الغير الين الين الين
الباحثين عن الحقيقه يتلقون
فيهم ... وهم عن الحقيقه باحثين
الدائرة من أنشط انظمة الحياه
الحين مدري ليه يطلع بعد حين
عندي يقين ان كل حس وله رديف
حتى بديت اشك ..ان عندي يقين
لا شفت لي بسمه اقول فخاطري
هذي قبل انين او بعد انين
ما فيه شي الا بشي يقابله
ولو كان مابه غيب مابه مؤمنين
احيان احس انه محد يشبه احد
واحيان احس انّا لنا مكررين
حنا الغريبين ف دواخلنا وانا
مستغرب ان حنا محن مستغربين
ما نلتقي فينا سوى في ضعفنا
لحظة مرض او خوف او لوعة ضنين
نستحقر اللحظات واحنا نعيشها
احياء لو نفهم شعور الميتين
اليوم دايم ننتظر بكره عليه
واليوم .. كان ال بكره المملي حنين
مجهول بكره اجمل من المعرفه
السحر دايم من ورى متى ووين
وكل شي في بكره يجوز اصدقه
في يوم من الايام كنت انا جنين
وال كنت رابط قبلها مع بعدها
ال كنت احياناً تسوي شي زين
انا القديم وانا الجديد ف معركه
وانا اللي من بين الثنين ..الله يعين
تعبت حيل اشوف نفسي من خلال
نفسي ونفسي مالها في نفسي عين
المؤمن مراية اخيه وناصحه
وانا م بين العالم المتأرجحين
ان افرحو خذوا الحياه بعرضها
وان امرضو صارو تقاه ودينيين
الفاشلين اليا تحدوا بينهم
اولهم اول بس بين الفاشلين
تطفو على سطح الحياه عقولهم
العمق فارغ من عقول الفارغين
يارب انا متعب ومتعبني انا
يارب ليتك خالقٍ مني ثنين
واحد يجازي السيئين بسوءهم
والثاني يعفو عن مساو السيئين
لله حكمه والردى يوم انخلق
يمكن عشان انعرف قدر الطيبين
مظاهر الاشياء مثل بطونها
ويا كم صرخه في شفاه الساكتين
عين الطموح تشوف فالعثره فرص
وعين اليؤوس تشوف فالفرصه كمين
احلم واعزي نفسي اليا من ذكرت
ان اغلب اللي فالسجون الحالمين
وانا مع اللي يختزلني ذكرها
افرد يديني بس ما عندي يدين
لها فصدري من مكان ومن زمان
ما يغرق المحجر وما يندي الجبين
احبّها ينقذني الله منّها
اخاف اموت وعادني فيها مدين
مدري الزعل مدري الاهل مدري الظروف
مدري ..ولكن ادري ان وضعي مشين
لانيب ناسيها ولا واصل لها
وانا اللي متعلق فكل الحالتين
من كثر ما هي ذروة الموت الاخير
انا معى كل شي بي.. متنافسين
احلامي خلتني وغدت تحلم بها
شف حتى احلامي معاها خاينين
الياسمين الياسمين الياسمين
الياسمين الياسمين الياسمين
ترديد اسم الورد حوّلكم الى
مستنشقين وانتو اصلا سامعين
وشلون انا اللي كل وقت اردده
انا اعيش ف حقل من نور وحنين
وكن تساميها على اطباع البنات
تسامي النخبه على المستشعرين
يا كيف يسلى من وجه حبيبته
كنه صباح العيد عند المسلمين
من ينحرم منه حرم عيديته
ومن شافه من العايدين الفايزين
مافيه شمس الا وتسألها الفجر ..
انا اليوم اشرق او انتي تشرقين؟
احبها وحبي من النوع القديم
اللي يبين ونصف عمره مايبين
ياكم وياكم من شفوف ومن حقوق
عاشت وماتت في صدور المستحين
وياكم وياكم من كروب ومن دروب
تذوب ل اقدام الرجال الشاسعين
اعلم اللي يحسب انها بالعمر
ماكبرت بعض الرياجيل السنين
ربّاه والدنيا صحيح مربيّه
لكنها ماهيب مثل الوالدين
كان العطا هديك والاخذ بملتك
عسانا معطين وعسانا ماخذين
وعسانا لامن كلحّت واستمحلت
على افواه اجياعها متوزعين
وعسانا لامن ايئسو سمّارها
انّا بما تقسم لنا متفائلين
وما الحياه الا علامات وحدود
ماتعّب التالين عقب الاولين
مهما وصلت من الشعور ابقى بها
وش فايدة حريتي وانا سجين
اللي ابيه اكبر من انه ينشعر
ما اعرفه لكني ادري انه ثمين
فلا يعتتب مثلي ليامنه حزن
الحزن من انعام ربي العالمين
الحزن انسانيه ف عصر الجمود
لذا انا سعيد لاني حزين
