مدونة عذب القصيد

قطر موطني وأنا مثل من تربوا فيه .

قطر موطني وأنا مثل من تربوا فيه ..

.. راع البل وراع المال والغيص والفلاح

رجال الا سمعوا نداه أجمعوا لبيه ..

.. تطيح الغتر والروس .. بس العلم ما طاح

سواعد الأمير وفي المحافل فخر ووجيه ..

.. ونارد حياض الموت كنحن خرز مسباح

لك حق تشره لو اني جيت ما جيتك ..

.. لاشك يامسنـدي تاتـي ولا تاتـي

في غيبتك لاحصل طاريك حييّتـك ..

.. واحمّل الغربي السـاري تحياتـي

ابعدت مثل الحرف لا فارق شفـاه ..

.. ثم ضاع باحضان الفضا في العباره

ماهو بفرض اني على طول ويـاه ..

.. الكل منّـا عـز راسـه شعـاره

لو كان من راسه الى حد ماطـاه ..

.. زينه يزيّن خطوتـه فـي مسـاره

ألا يا وجودي وجد من فاجأه ديان ..

.. برغم اعتزال الناس من كثرة اديونـه

بعد ما فضى جيبه وكفه وحاله شـان ..

.. تناسوه ربعـه كنهّـم مـا يعرفونـه

تناسوا مواقيفه ولا كـن شـيٍ كـان ..

..على غير ما ترضى الكرامه يحدونـه

وهو كان منقع طيب منهل وفا واحسان ..

.. فلاشـك عّـوان الزمـان ايتحدونـه

رفع كفه الخالي الي الخالق الرحمـن ..

..عقب ما تصافوا كلهم ظلم مـن دونـه

في غيبتك ما ألد منا ومنا ..

.. ذ**** تملى وحشتك في غيابك

بالوقت في شوفة حلاك اتهنّـا ..

.. في وقفتك في مشيتك في ثيابك

لاجل العيون الناعسات اتغنّـا ..

.. الله يخلي لي غـلاك وشبابـك

البوح لك في شوفتك ما تسنّـا ..

.. مثل الكفوف الى شغلها التشابك

نسيت نفسي بين خنـه وحنّـا ..

.. بين العيون وبين صافي عذابك

البايع الشاري مع الناس مقبول ..

.. بيع وشرا عااادي.. قبول وتراضـي

الى اجتمع مرهي وشاعر ومخبول؟؟

.. خلطة ادب فاشـل تثيـر امتعاضـي

تشرى الذمم واتباع بالعرض والطول ..

.. والكـل ينظرهـااا بعينـه وراضـي

المال خلاّ غير معقووول؟؟ معقوول!!

.. ما ألوم نجم الاغنيّـه قـام ياضـي

ياللأسف.. ما كل منقـول مقبـوول ..

.. ثوبٍ مشجّر جنّب ثوبٍ ابياااااضـي

اذا اللي قبلنا مـا علمـوك؟ .

اذا اللي قبلنا مـا علمـوك؟ ..

.. مثل من جا وصـدّر مـا روا

ونكرانك جميل اللـي هـدوك ..

.. مثل من جوّد الصقر وشـوا

وسجّ وهج عن من هم نسوك ..

.. ترى من يتبع المقفـي غـوا

الذكا ما يلبس للفتى لبس ثوب ..

.. لا يحرّج عليـه ولا لمثلـه مـزاد

لا تدافع من اللي يحتمي له بطـوب ..

.. لا صفى جو مكه وش علي من تشاد

دام فيها مثل ماقيل نفضـة جيـوب ..

.. خل وضح النقا والصدق شف ومراد

حكّم ضميرك بين الاثنين واختّـر ..

.. لاهل العلا جرّه .. وللـدون جـرّه

الطيـب ماحـدد ابّحـرٍ ولا بـرّ ..

.. من جا على دربه من الخلق سرّه

يوم اللقا ما انّصف ضعيفٍ ولا سرّ ..

.. اللا مع مـن جـاد كـرّه وفـرّه

لو كان شفت النّاس ببشوت وغتّر ..

.. كم من محارٍ مـا لقـي فيـه درّه

الحلقه ان زرّت ابطان الجمـل زرّ ..

.. ما استرّ من لا عزوةٍ لـه تسـرّه

الجمره ان ماتت فلا ينّفـع الكـرّ ..

.. مافادهـا الشبّـاب لـو زاد كـرّه

كم واحدٍ يضحك وهو يضمر الشرّ ..

.. عرق الشري ما انّباك لونه بقّـرّه

ما كل من يضحك بوجه الفتى بـرّ ..

.. من يصدق الصاحب بالافعال بـرّه

قد عطيتك وانـت ماضنـك لئيـم ..محمد بن فطيس

قد عطيتك وانـت ماضنـك لئيـم ..

.. والنصيـحـه لليـالـي تـذكـره

لاتحرك جرحـي الماضـي الاليـم ..

.. ولاتحسب ان طول بعـدك طهـره

كل جرح يهـون يالجـرح القديـم ..

.. وكل شي قد مضـا معـك اذكـره

جرحي وذكـراك والليـل البهيـم ..

.. حـزت فـوادي بمثـل المنشـره

العذول غراب وانا اكبـر غشيـم ..

.. والجروح الماء وطاريـك حجـره

والزمان اكرم من الحـظ الكريـم ..

.. لانفتح لي بـاب صوبـك سكـره

وحبك اللي لاطرى لي رحت اهيـم ..

.. قمت احسب اصغر كلامك واكبـره

ليتنـي عـاد الهـوا تـوه فطيـم ..

.. انعذلـت لعاذلـي بـس خـيـره

مالقيت من الوفـاء يـااول نديـم ..

.. كون صدق الحزن وجهه وظهـره

عقب رمح الشوق في وجه الصميم ..

.. سيف هجرك في قفاه وشف ثـره

وانت شكلك تحسبنـي فـي نعيـم ..

.. لنـي اخبـي صوابـي واستـره

لايغـرك حلـم رجــال حلـيـم ..

.. مهون اللي مـن سكوتـه فجـره

ولاتحسب الجفن من دمعه عقيـم ..

.. يستحي منك والى اقفيـت انثـره

ولايغرك وان بدا جسمـي سليـم ..

.. والله ان جسمي سـوار المقبـره

والله ان امر من ضحـك الغريـم ..

.. شوف حقي بين اياديـه اشكـره

والله ان احر مـن دمـع اليتيـم ..

.. دمعة الرجـال مـن فرقـا مـره

أرشيف المدونة الإلكترونية