البارحة ربـي كتب لي ومريت
دربٍ عليه بروق الأحباب لاحت
جيت المكان اللي جمعنا وخفيت
وقامت جروحي للجوارح وصاحت
التم غيـم الدمع من يوم لفيت
ورقا القصيد لشوفة الغيم ناحت
ياليتني في لفة الدرب زليت
كان العيون مـن الدموع استباحـت
وضحكت ما أبغي الناس تدري يبالفيت
لكنها غصبٍ على العين ساحت
حارت دموعي في عيوني وصديـت
وأرمشت مابيها تبيـن وطاحـت
وعقبه برق في العين براق واسقيت
خدي ووناتي بصدري تلاحت
وأنا أحسب إني في فراقه تشافيت
وان عبرتي من مدخل الزاد زاحت
اللي يحسب إني على البعد سجيت
والا ان عيوني للرقاد استباحت
ياليتني من قبل لا أحبه اقفيت
والا ان دروبي عن دروبه تناحت
أهون علي من البكا والتناهيت
وأشلا من سدودٍ على الناس باحت
عرفت كيف الحي يفرق عن الميت
وعرفت قيمة نعمتي يوم راحت
قولوله اني عقـب بعده تدانيت
ورجلي عن دروب المعافين شاحت
البعد نار وطاعـة العذل كبريـت
يقصر على بعده ترى الكبد فاحت
محمد بن فطيس
